முதலாவது திருவழிபாடு ஆண்டு
பொதுக்காலம் 29வது வாரம் திங்கட்கிழமை
2017-10-23

முதல் வாசகம்

சகோதரர் சகோதரிகளே, கடவுளின் வாக்குறுதியைப் பற்றி ஆபிரகாம் ஐயப்படவே இல்லை; நம்பிக்கையில் அவர் மேலும் வலுப்பெற்றார்; கடவுளைப் பெருமைப்படுத்தினார். தாம் வாக்களித்ததைக் கடவுள் செய்ய வல்லவர் என்பதை அவர் உறுதியாய் அறிந்திருந்தார். ஆகவே ``அதை ஆண்டவர் அவருக்கு நீதியாகக் கருதினார்.'' ``நீதியாகக் கருதினார்'' என்று எழுதியுள்ளது அவரை மட்டும் குறிக்கவில்லை; நம்மையும் குறிக்கின்றது; இறந்த நம் ஆண்டவர் இயேசுவை உயிர்த்தெழச் செய்தவர்மீது நம்பிக்கை கொண்டிருக்கும் நாமும் அவ்வாறே கடவுளுக்கு ஏற்புடையவர்கள் எனக் கருதப்படுவோம். நம் குற்றங்களுக்காகச் சாகுமாறு கடவுள் இயேசுவை ஒப்புவித்தார்; நம்மைத் தமக்கு ஏற்புடையவர்களாக்குமாறு அவரை உயிர்த்தெழச் செய்தார்.

- இது ஆண்டவர் வழங்கும் அருள்வாக்கு.

- இறைவா உமக்கு நன்றி

பதிலுரைப் பாடல்

69-70 தம் தூய இறைவாக்கினர் வாயினால் தொடக்க முதல் அவர் மொழிந்தபடியே அவர் தம் ஊழியராகிய தாவீதின் குடும்பத்தில் வல்லமை உடைய மீட்பர் ஒருவர் நமக்காகத் தோன்றச் செய்தார். -பல்லவி

71 நம் பகைவரிடமிருந்தும் நம்மை வெறுப்போர் அனைவரின் பிடியிலிருந்தும் நம்மை மீட்பார். 72-73 அவர் நம் மூதாதையருக்கு இரக்கம் காட்டி, தமது தூய உடன்படிக்கையையும், நம் தந்தையாகிய ஆபிரகாமுக்கு அவர் இட்ட ஆணையையும் நிறைவேற்ற நினைவு கூர்ந்தார். -பல்லவி

74-75 இவ்வாறு நாம் பகைவரின் பிடியிலிருந்து விடுவிக்கப்பட்டுத் தூய்மையோடும் நேர்மையோடும் வாழ்நாளெல்லாம் அச்சமின்றி அவர் திருமுன் பணி செய்யுமாறு வழிவகுத்தார். -பல்லவி

நற்செய்திக்கு முன் வாழ்த்தொலி

நற்செய்தி வாசகம்

அக்காலத்தில் கூட்டத்தில் இருந்த ஒருவர் இயேசுவிடம், ``போதகரே, சொத்தை என்னோடு பங்கிட்டுக்கொள்ளுமாறு என் சகோதரருக்குச் சொல்லும்'' என்றார். அவர் அந்த ஆளை நோக்கி, ``என்னை உங்களுக்கு நடுவராகவோ பாகம் பிரிப்பவராகவோ அமர்த்தியவர் யார்?'' என்று கேட்டார். பின்பு அவர் அவர்களை நோக்கி, ``எவ்வகைப் பேராசைக்கும் இடங்கொடாதவாறு எச்சரிக்கையாய் இருங்கள். மிகுதியான உடைமைகளைக் கொண்டிருப்பதால் ஒருவருக்கு வாழ்வு வந்துவிடாது'' என்றார். அவர்களுக்கு அவர் ஓர் உவமையைச் சொன்னார்: ``செல்வனாயிருந்த ஒருவனுடைய நிலம் நன்றாய் விளைந்தது. அவன், `நான் என்ன செய்வேன்? என் விளைபொருள்களைச் சேர்த்து வைக்க இடமில்லையே!' என்று எண்ணினான். `ஒன்று செய்வேன்; என் களஞ்சியங்களை இடித்து இன்னும் பெரிதாகக் கட்டுவேன்; அங்கு என் தானியத்தையும் பொருள்களையும் சேர்த்து வைப்பேன்'. பின்பு, ``என் நெஞ்சமே, உனக்குப் பல்லாண்டுகளுக்கு வேண்டிய பலவகைப் பொருள்கள் வைக்கப்பட்டுள்ளன; நீ ஓய்வெடு; உண்டு குடித்து, மகிழ்ச்சியில் திளைத்திடு எனச் சொல்வேன்'' என்று தனக்குள் கூறிக்கொண்டான். ஆனால் கடவுள் அவனிடம், `அறிவிலியே, இன்றிரவே உன் உயிர் உன்னைவிட்டுப் பிரிந்துவிடும். அப்பொழுது நீ சேர்த்து வைத்தவை யாருடையவையாகும்?' என்று கேட்டார். கடவுள் முன்னிலையில் செல்வம் இல்லாதவராய்த் தமக்காகவே செல்வம் சேர்ப்பவர் இத்தகையோரே.''

- இது கிறிஸ்து வழங்கும் நற்செய்தி.

- கிறிஸ்துவே உமக்கு புகழ்.

இன்றைய சிந்தனை

பணம் எதற்காக ....

உயிர் இல்லாத அழகு, வீண். சாதனை இல்லாத அறிவு வீண். பணிவு இல்லாத வீரம் வீண். தர்மம் இல்லாத செல்வம் வீண். ஆன்மீகம் இல்லாத வாழ்க்கை வீண்.

நண்பருடன் ஒரு உரையாடல்.

சபை மக்களின் வாழ்க்கை எப்படி உள்ளது ? ஆன்மீகம் குறைந்தவர்களின் வாழ்க்கை நன்றாக இல்லை. ஆன்மீகம் நிறைந்தவர்களின் வாழ்க்கை மிகச் சிறப்பாக உள்ளது. ஆன்மீகக் குறைவுக்குக் காரணம் என்ன ? அத்தகையோர் பணம் சம்பாதிப்பதை மட்டுமே குறிக்கோளாகக் கொண்டவர்கள்.ஆன்மீகம், ஆண்டவன் ,கோயில், வழிபாடு இல்லாதவர்கள். பணம் சம்பாதிக்க வேண்டும். பணத்தைச் சேமிக்க வேண்டும் என்பதெல்லாம் தவறில்லை. சரிதான். எதற்காக சம்பாதிக்க வேண்டும் ? எதற்காக சேமிக்க வேண்டும் என்பதில்தான் சிக்கல். தேவைக்கு அதிகம் வைத்திருப்பவன் திருடன், கொள்ளைக்காரன். சம்பாதித்த பணத்தில் தேவைக்கு அதிகமானதை ஏழை எளியோருக்காக தான தர்மம் செய்யும்போது கடவுள் முன்னிலையில் செல்வம் சேர்க்கிறோம். அந்த செல்வம் வாழ்வைத் தரும். தன்னைத் தாண்டி செல்வந்தனால் சிந்திக்க முடியவில்லை. என்னதான் நான் உழைத்தாலும், பணம் கடவுள் தந்தது. அதை அவருக்கே திரும்ப கொடுக்க வேண்டும். அயலானுக்குக் கொடுக்கும்போது ஆண்டவனுக்கே கொடுக்கிறேன் என்ற சிந்தனை வேண்டும். கல்லுக்கள் வாழும் தேரைக்கும் உணவ+ட்டும் இறைவன், தன் கண்ணுக்குள் வைத்திருக்கும் உன்னைப் புறக்கணிப்பாரோ!

மன்றாட்டு:

இறைவா, இயேசுவைப் பின்செல்வதில் நாங்கள் நிலையாய் இருக்க அருள்தாரும்.