திருவருகைக்காலம் முதல் ஞாயிறு

விழிப்பாயிருங்கள்.....

எசாயா 63; 16-17,64; 3-8
1 கொரிந்தியர் 1:3-9
மாற்கு 13;33-37

எசாயா 63; 16-17,64; 3-8
1 கொரிந்தியர் 1:3-9
மாற்கு 13;33-37
திருவருகைக்காலம் முதல் ஞாயிறு
விழிப்பாயிருங்கள்.....
"தீப்பெட்டியின் கடைசி தீக்குச்சியைப் பற்றவைப்பதில் உள்ள கவனம்
முதல் தீக்குச்சியிலேயே வந்துவிட்டால் வாழ்க்கையில் எளிதாக வெற்றி பெறலாம் "
என்பர் அறிஞர் சிலர். கவனம், விழிப்பு நம் வாழ்க்கைக்கு மிக மிக அவசியம் என்பதை இவ்வரிகள் நமக்கு எடுத்துரைக்கின்றன. நமதாண்டவரின் பிறப்பின் வருகைக்காக நம்மை நாமே தயாரித்துக் கொண்டிருக்கக்கூடிய நாட்கள் இவை. இந்நாட்களில் நமதாண்டவர் நம்மை மிகுந்த விழிப்பு நிலையில் இருக்க வலியுறுத்துகிறார். விழிப்பு என்றதும், நாம் தூங்கி எழுந்ததும் வருமே, அது என்று நம்மில் பலர் நினைத்துக் கொண்டு இருக்கின்றோம். அதுவும் விழிப்பு தான். அது கண் விழிப்பு மட்டுமே. ஆனால் ஆண்டவர் கூறுவது முழு மன உடல் நிலை விழிப்பு.. ஆம் ஆழ்ந்த உறக்கத்தில் நாம் நம்முடைய ஆசை, ஆணவம், எண்ணங்கள், அனைத்தையும் கைவிடுகிறோம். இதையே விழிப்பு நிலையில் வாழும் போது நம்மால் கைவிடமுடிந்தால் நாம் யாரென்று அறிந்து கொள்ள முடியும். நாமும் பல நேரங்களில் விழிப்பாக தான் இருக்கிறோம். நம்முடைய தான் என்ற முனைப்பு எவ்விதத்திலும் யாராலும் தொடப்படவோ விமர்சிக்கப்படவோ கூடாது என்று நினைக்கின்றோம். வெற்றி பெற வேண்டும் என்று நினைப்பவர்களை விட தோற்று விடக்கூடாது என்று நினைப்பவர்கள் தான் இங்கு அதிகம். நமது விழிப்பு வேறு திசை நோக்கி சென்று கொண்டிருக்கின்றது. எனவே தான் ஆண்டவர் நமது திசையை அவரை நோக்கி திருப்ப அழைக்கின்றார். நம்முடைய கவனம் விழிப்பு நிலை இரண்டையும் அவரை நோக்கி திருப்ப அழைக்கின்றார்.

இன்றைய முதல் வாசகம் நம்முடைய விழிப்பு நிலை நாம் யார் எப்படிப்பட்டவர்கள் என்பதிலும் இரண்டாம் வாசகம், நமது விழிப்பு நிலை எதை நமக்கு பெற்றுத் தர இருக்கின்றது என்பதனையும், எடுத்துரைக்கின்றது. நற்செய்தி வாசகமோ, நமது கவனம் எதில் அதிகமாக இருக்க வேண்டும் என்று கூறுகின்றது.

நாம் யார்?
முதல் வாசகத்தில் எசாயா இறைவாக்கினர் வாயிலாக இஸ்ரயேல் மக்கள் தாங்கள்யார் என்பதனையும் தங்கள் கடவுள் எப்படிப்பட்டவர் என்பதனையும் அறிந்து கொள்கின்றனர். ஆண்டவரை தங்களது மீட்பராக தந்தையாக ஏற்றுக்கொள்கின்றனர். தம்மை நம்பியிருப்போருக்காக செயலாற்றும் கடவுள், இவரைப் போல் வேறு யாரையும் கண்டதுமில்லை கேள்விப்பட்டதுமில்லை என்று சான்று பகர்கின்றனர். தங்களது பாவங்களால் தம்மை படைத்த கடவுளை மனம் நோகச்செய்து விட்டதை எண்ணி மனம் வருந்துகின்றனர். தாங்கள் களிமண் போன்றவர்கள், இறைவன் தங்களின் குயவன் என்று தங்களது நிலை உணர்ந்து இறைவனிடம் மீண்டும் திரும்பி வருகின்றனர்.
நம்மிடம் இறைவன் கேட்பதும் இத்தகைய விழிப்பு நிலையையே. இறைவன் முன் நாம் யார் நம் நிலை என்ன என்பதை அறிந்து வாழ வேண்டும். நாம் அனைவரும் இறைவனின் கை வேலைப்பாடுகள். அவரால் உருவாக்கப்பட்ட களிமண் பாத்திரங்கள். எனவே நம் திறன் அறிந்து செயல்படவெண்டும். நாம் ஒவ்வொருவரும் ஒவ்வொரு காரணத்திற்காக உருவாக்கப்பட்டிருப்போம். எனவே அதன் நோக்கம் அறிந்து செயல்படவேண்டும்.

எதைப் பெறுகின்றோம்?? பெற இருக்கின்றோம்??
இறையருளைப் பெறுகின்றோம். சொல்வன்மையும் நிறையறிவும் அருள் கொடைகளையும் பெற இருக்கின்றோம். அவரால் உறுதிப்பட இருக்கின்றோம். கிறிஸ்துவின் நட்புறவில் பங்கு கொள்ள அழைக்கப்படுகின்றோம். இந்த இறையருள், சொல்வன்மை, நிறையறிவு அருள்கொடை இவை அனைத்தையும் பெற இருக்கும் நாம் மிகுந்த விழிப்பு நிலையில் இருக்க வேண்டும். வெறும் பொருள், பணம், சொத்து, வைத்திருக்கும் செல்வந்தர்களாக இல்லாமல் மனதளவில் செல்வந்தர்களாக வாழ அழைக்கின்றார். எவ்வளவு தான் சொத்து சுகம் இருந்தாலும் மனதளவில் நிறைவின்றி பலர் வாழ்ந்து கொண்டு தான் இருக்கின்றனர். எதுவும் இன்றி குடிசையில் வாழ்பவர்களும் சில நேரங்களில் மன நிறைவுடன் தான் வாழ்கின்றனர். ஏனெனில் அவர்களோடு இறையருள் இருப்பதால். சொல்வன்மையும் நிறையறிவும் இன்று நம்மில் பலபேருக்கு தேவை. அதில் குறைபாடு இருப்பதால் தான் பலரது வாழ்வில் பல சிக்கல்கள். இவை அனைத்தையும் பெறவே நாம் நம்மையே தயாரித்துக் கொண்டிருக்கின்றோம் என்ற விழிப்பு நிலையில் நாம் வளர வேண்டும்.

எதில் இருக்க வேண்டும் நமது விழிப்பு :
நாம் நம்முடைய நேரத்தில் விழிப்பாக இருக்க வேண்டும் என்பதனை நற்செய்தி வாசகம் மூலம் எடுத்துரைக்கின்றார். பயணம் செய்யும் தலைவர் தன்னுடைய பணியாளர்களை அவரவர் பணிக்கு பொறுப்பாளர்களாக நியமிக்கின்றார். விழிப்பாக இருக்கச்சொல்லி வலியுறுத்துகின்றார். பணியாளர்கள் இப்பொழுது பொறுப்பாளர்கள். அதை அவர்கள் உணர்ந்து செயல்பட வேண்டும். நம்மில் பலருக்கு நாம் பணியாளர்களா பொறுப்பாளர்களா என்ற தெளிவு இருப்பதில்லை. எனவே தான் பொறுப்பாளர் செய்ய வேண்டிய வேலையை பணியாளரும் பணியாளர் செய்ய வேண்டியதை பொறுப்பாளரும் செய்து குழப்பத்திற்கு உள்ளாகின்றனர்.
அடுத்ததாக வாயிற்காவலருக்கு தன் உடைமை முழுவதையும் திருடனிடமிருந்து பாதுகாக்கும் பொறுப்பை ஒப்படைக்கின்றார். வாயிற்காவலர் வாசலுக்கு மட்டுமல்ல. வீடு முழுமைக்கும் அவர் தான் பொறுப்பு. அவர் மிகுந்த விழிப்பு நிலையில் இருக்க வேண்டும். தலைவர் வரும் நேரம் அவர் விழிப்போடு காவல் செய்வதைக்காண வேண்டும். இல்லையேல் அவர் வேலை பறி போகும் நிலை வரலாம்.
நம்முடைய உடல் என்னும் எண்சான் உடம்பிற்கு, வாயிற்காவலன் வாய் என்பர். நமது வாய் பல நேரங்களில் தன்னுடைய பணியை சரிவர செய்யாததால் தான் பல பிரச்சனைகள். சில நேரங்களில் அதிகம் பேசுவதால், சில நேரங்களில் பேசாமல் இருப்பதால். நாம் நம்முடைய வார்த்தைகளிலும் சொல்லும் சொற்களிலும் நம்முடைய கவனத்தை அதிகமாக செலுத்து செயல்படும்போது, நம் இல்லம் என்னும் மனமும் உடலும் நலமாக இருக்கும் . நம் தலைவராம் ஆண்டவர் வரும் வேளையில் அவர் தம் இல்லமாகிய நாம் நலமுடன் இருப்பதைக் கண்டு மகிழ்வார். எனவே மிகுந்த விழிப்பு நிலையிலிருக்க முயல்வோம்.

ஆக நமதாண்டவரின் வருகைக்காகக் காத்திருக்கும் நாம், நாம் யார்? எதை பெறுவதற்காக? எதில்? நமது விழிப்பு நிலை துல்லியப்பட வேண்டும் என்பதை அறிந்து செயல்படுவோம். நமது விழிப்பு அலாரம் வைத்து எழும்பும் அனுதின கண் விழிப்பாக இல்லாமல் எந்நேரமும் துடிப்புடன் செயல்படும் இதயத்துடிப்பு விழிப்பாக இருக்க முயற்சிப்போம். அன்பை அடையாளமாகக் கொண்ட இந்த முதல் வார திருவருகைக் காலமானது நம்மிலும் நம்மைச்சுற்றிலும் அன்பை பொழிய இறைவனிடம் அருள் வேண்டுவோம். இறைவனின் ஆசீர் என்றும் நம்மோடும் நம் குடும்பத்திலுள்ள அனைவரோடும் இருப்பதாக ஆமென்.